煲呔曾因「慳電膽益親家」風波搞到一身蟻，受事件所累嘅環境局局長邱騰華一樣唔好過，依家提起慳電膽都驚，睇佢尋日巡視環保國際博覽展嘅路線圖就知嘞。佢一口氣睇咗十六個展示攤位，污水處理系統、廢物回收、電動車、再生能源，瓣瓣都畀面，但係現場多個慳電膽攤位，佢就全部避之則吉，話佢唔係心虛都無人信啦。
貿發局回覆傳媒查詢話，邱騰華巡視展場嘅路線，係佢哋建議嘅，不過，環境局會畀意見刪除邊啲點。路線圖邊個定，好明顯啦。煲呔曾強推慳電膽以圖益親家，其後又被踢爆政府計劃喺添馬艦發展計劃以更環保嘅發光二極管（LED）燈膽取代慳電膽，業界同環保團體齊轟煲呔曾假環保，邱騰華尋日見到慳電膽三個字都驚，去到LED燈膽攤位一樣視而不見，咁嘅表現，係咪叫欲蓋彌彰呢？
不過世事冥冥中有安排。正當佢巡完攤位、坐過心儀嘅電動車展品，竟然失驚無神被一位內地LED燈膽生產商拉住，向佢講解LED點樣環保過慳電膽，邱騰華避無可避，惟有板住塊面「受教」。