連施政報告都大吹台灣風，台灣駐港機構光華新聞文化中心亦宣布十一月份為《台灣月》。光華一姐路平尋日開記招推介節目，外界對路平嘅去留更感興趣，皆因路小姐已經辭官，返工到十二月尾，傳聞係同國民黨上場要改朝換代有關，但路小姐就澄清話，離開同政治因素無關，係香港呢個城市唔夠性感喎！
做咗光華主任七年，路平已變成香港通，行遍香港郊野不在話下，連邊度有美味脆皮雞、廣東靚湯水佢都知得一清二楚，更學會一口流利廣東話。不過性格浪漫嘅路平，已決定放棄香港所有，以自駕遊方式浪迹天涯去也，理由係香港工作節奏太快，令佢腦袋乾涸到無晒創作靈感，係時候辭工抖一抖。
留港七年，路平對香港男人看得通透，佢話香港男人好識氹人，氹到女人心花怒放，但論氣魄就唔及台灣男人咁Man。咁講法，怪唔得路平寧願返台灣「尋寶」去也。
同香港話別前，路平對香港未來發展仍然關心，佢話港府如果真心想同台灣加強交流，千祈唔可以流於官式姿態訪問，高官們要放下身段，以平民身份感受吓台灣至得。路平又為香港前景把脈，話香港唔可以獨沽一味打着金融中心旗號，否則上海遲早趕過香港。港人要生存，就要加多兩錢肉緊發展創意文化喎。