講開先知，原來之前幫葉太做咗三年嘅助理已經離職，轉咗去康文署轄下嘅博物館做項目經理，人工仲翻咗幾番添！葉太就自爆話自己好旺伙記，皆因佢成立匯賢智庫咁耐，已經走咗好幾個助理。葉太嘅前助理離職，佢將原本份工一分為二，點知寫信嚟求職嘅一共有三百人，由此反映香港失業情況仍然嚴重。又或者求職者收到料，知道做過葉太嘅下屬，都可以喺轉工後升職加薪。

雖然葉太話自己從來無睇過相到底係咪真旺伙記，不過實例實在太多，淨係計佢未做立法會議員前嘅下屬，依家都係個個好景。例如喺葉太做入境處處長期間，跟過佢嘅李少光同黎棟國，依家就分別扶搖直上做保安局局長同副局長；而喺保安局跟過葉太嘅湯顯明，依家就成為第一個由退休政務官出任嘅廉政專員。