煲呔曾連環爆出「慳電膽益親家」同「弟婦蝕雷曼迷債提早獲賠」醜聞，激起全城義憤，不過，換個角度睇，對香港唔係完全無益處，事關事件已經激發全城創意，連日嚟網民、政黨同民間組織嘲諷煲呔曾嘅手法層出不窮，「燈膽權」、「港版阿扁」、「禮親府」，靈感如泉湧不息，連舞台劇《東宮西宮》都要急急推出諷曾「升呢版」，發揮創意無極限。煲呔曾成日話扶助創意產業，佢呢次無講大話！
自從煲呔曾被揭發施政報告逼市民買慳電膽益親家之後，網民開始惡搞煲呔曾，「燈膽權」、「燈泡權」同「曾濫權」一類別具創意嘅花名不脛而走，抗議標語、道具同手法，更加係五花八門，爭奇鬥異，大鬥創意。呢股民間集體智慧，勢將隨着今次「燈膽權」事件一同寫入特區史冊，變成香港人嘅集體回憶，真係好值得大家再三回味。
監犯衫版本夠過癮
施政報告發表後第三日，已經有網民改寫鄧麗欣舊歌《電燈膽》，憑歌寄意贈爆出「慳電膽益親家」嘅煲呔曾，又有政黨示威，更加造咗個大型煲呔曾畫像，將燈泡塞晒入佢個「口」。其後，煲呔曾再爆出姻親三弟曾蔭煊老婆林淑貞神奇提早獲賠雷曼迷債，惡搞「燈膽權」嘅創意思潮迅速席捲民間，全民參與諷曾集體創作，民間組織107動力上演街頭劇，諷喻禮賓府已經變成「禮親府」；網民將煲呔曾化身港版陳水扁，到最近有網民設計咗多款海報，有漫畫版嘅，亦有改編「廉政行動2009」嘅煲呔曾監犯衫版本，真係創意無極限。
風頭蓋過甘威事件
呢股惡搞「燈膽權」創意思潮尋日撲至立法會，全民退休保障聯席創作咗一大堆「六大慘葉」，送畀議員，諷刺煲呔曾只顧搞六大產業，漠視基層水深火熱，貧困長者慘過「弟弟」；又有公民黨陳淑莊宣布，佢有份主演嘅《東宮西宮之西九龍珠》將推出「升呢版」，加入慳電膽同林淑貞事件新元素。
早前備受因求愛不遂炒女助理事件困擾嘅民主黨甘乃威，問陳淑莊《東宮西宮》「升呢版」嘅嘲諷新元素中有冇佢份，陳打電話畀編導胡恩威，胡恩威叫陳淑莊講畀甘乃威聽：「佢已經Out咗嘞！」咁又係，講激發創意，依家仲邊有題材好得過煲呔曾？香港人成日被人話受填鴨式教育，缺乏創意，經「燈膽權」呢一役，呢句話相信都要改寫囉。