香港嘅貧富懸殊愈嚟愈嚴重，但相信香港仲有好多人都未知道真正嘅「窮」到底係點樣嘅一種生活。專門協助貧困農民自力更生嘅國際小母牛香港分會前排就去咗安徽做考察，睇吓小母牛喺當地開展嘅扶貧項目做成點，主席梁錦松同佢退役跳水王后老婆伏明霞都跟埋去，真正體驗農民嘅生活。
阿松兩公婆喺一個農村家庭住咗一日，阿松除咗要幫手捕魚，仲要受短暫夫妻分離之苦。原來呢家人間屋之前被暴雨沖塌，所以男戶主就要喺魚排上嘅屋仔瞓覺，唔可以同屋企人一齊，佢嘅經歷令阿松非常感慨。
小伏降格做一日農村家庭女主人都唔輕鬆，佢晨早起身就划木艇送小朋友返學，仲要擔水洗衫、落田摘菜同曬鹹魚，單睇行程都知佢一定忙過平時打理家頭細務。不過小伏一啲都無詐型，仲話呢個體會好有意義添！
其實前經濟發展及勞工局局長葉澍堃（Stephen）都有去呢個農村行，Stephen仲準備咗拿手小菜鹹魚炒蛋畀班村民食。佢話呢種係香港咁大眾化嘅食物，班村民從來都無食過，令佢更明白自己嘅幸福。Stephen咁有心，相信村民一定滋味在心頭嘞！