「喪拼」（Shopping諧音，即購物）唔係女人嘅專利，堂堂九巴後人兼港區人大代表雷添良（Tim）上周六就單拖去太古廣場（ＰＰ）嘅超市Great，狂掃日本白桃啫喱，買嘢唔假手傭人，認真冇架子！咁啱得咁蹺，匯賢智庫主席葉劉淑儀當日亦喺ＰＰ狂掃秋裝，兩人掃貨地點唔同，但同樣滿載而歸。
Tim雷掃貴價啫喱
卓妮上周六下午喺ＰＰ行街，行經高檔超市Great時，遇見Tim雷推住架超市購物車喺貨架前左揀右揀，尤其對生果、牛奶及零食最有興趣。揀完一輪後，Tim雷掃咗五盒即食啫喱及一包家庭裝牛奶，卓妮上前同佢打招呼，佢話咁啱行開呢頭，順便入吓貨，因為有啲食物只有Great有得賣喎。到底Tim雷想搵乜嘢刁鑽食品呢？之唔係日本白桃啫喱囉，每盒賣$15.3。佢無解釋點解鍾情呢款啫喱，不過據卓妮了解，日本啫喱以含有新鮮果肉聞名，白桃喺香港又較少有，所以畀貴啲都值得。
卓妮轉話題問佢點睇香港成為全球貧富最懸殊嘅城市，Tim雷話好彩食物價格未算太瘋狂，普通市民仲買得起喎。
葉劉購行政套裝
同阿Tim講拜拜後，卓妮轉頭撞見葉太，見佢手中抽住大袋戰利品，原來啱啱喺意大利名牌SPORTMAX「大出血」，購入行政人員套裝，使咗幾多錢就唔講嘞！葉太向來鍾情Emporio Armani套裝，貪佢剪裁夠大方，但身邊愈來愈多人着呢個牌子，出席社交場合好易同人撞衫，所以轉着其他牌子，換吓口味。葉太買衫地點遍及歐美，舊年去美國紐約探囡囡時，順道穿梭當地名店入貨，買咗件綠色釘珠片外衣，盛惠幾百蚊美金，前晚佢去飲陳鑑林娶新抱嗰餐，一於晒新衫。
卓妮