醫管局護士學校月前開辦普通科及精神科登記護士課程，有志成為「白衣天使」的林小姐計劃報讀兩科，以增加入選機會。經向醫院查詢後，獲悉只能報讀一科，林遂選讀心儀之精神科，惜最終落選。不過，事後卻從友人口中獲悉原來可同時報讀兩科，頓感氣憤難平。

斥安排違公平精神

「又話唔畀報兩科，結果我個朋友就報晒，仲有兩次面試機會，即係醫管局講一套做一套啦！」林小姐隨即向醫管局投訴，職員回覆時聲稱會通知考生只能二選其一，騰出的學額將留予其他合資格考生補上；未料，林之友人進行普通科登記護士面試時，又即場獲發表格報考精神科，「醫管局一時一樣，咁究竟可以考兩科定唔可以？真係好混亂！」

另一考生陳先生亦對醫管局處理護士課程申請安排大表不滿，認為有違公平精神，「醫管局安排啲普通科考生面試埋精神科，好明顯係貪『就手』，對有心喺精神科發展嘅申請人好唔公平，佢哋應該取消今次程序，重新招生！」陳先生已去信醫管局反映不滿。

就政策混亂之指摘，醫管局發言人未有正面回應，只強調申請者只可選擇報讀普通科或精神科登記護士其中一項課程，並須經甄選入圍始獲安排面試，而兩課程之甄選標準相同。不過，發言人補充，倘入圍申請者面試後有意報讀另一項課程，該局亦會安排另一項課程之面試機會。

議員力促檢討交代

「既然報名講明只可二揀一，點解面試嗰陣又畀人揀多一科？咁咪自打嘴巴！」衞生服務界立法會議員李國麟批評醫管局政策混亂，必須檢討，並向考生交代。

香港精神健康護理學院副會長麥國風亦直斥醫管局行政混亂，對考生有欠公平，「話明只准報一科，但之後又畀考生『叫兩飛』，對依足規矩揀一科嘅考生絕對唔公平！」麥國風又質疑醫管局限制考生只可報讀一科的做法並不合理，「報兩科完全冇衝突，好似考警察咁，唔通唔畀人同時考督察咩！」

記者 黃詩雅