之不過，呢個海濱長廊工程同其他大大小小嘅政府工程都係一擔擔，至今依然十畫都未有一撇，只聞樓梯響，不見人下來。今次政府又有乜死撐嘅藉口呢？賴天氣熱工人開唔到工？定係賴地硬打唔到樁？

原來統統都唔係，今次政府將責任賴晒落裝卸區嘅十二間廢紙回收商身上，暗示佢哋唔肯接受搬遷方案，先至令到海濱長廊完工遙遙無期，真係姓賴！

嘿，當局唔講猶自可，一講當堂令到業界把幾火，查實並非裝卸區內嘅廢紙回收商唔肯搬，只不過係當局做啲唔做啲，唔理業界嘅訴求，一直未搵到合適嘅地方畀佢哋搬。

業界一腳踢爆曾經多次向環保署、商務及經濟發展局、運輸及房屋局同埋海事處表達意見，好冷靜咁同政府講道理，但當局對業界提出嘅可行建議，好似借咗聾耳陳隻耳，一直闊佬懶理。如今海濱長廊工程呈膠着狀態，就將個責任卸晒落回收商身上，業界硬食呢隻死貓，唔嬲就假咯！

查實當局早於五年前就知道業界嘅要求，就係要集體遷往同一地點繼續運作，仲曾經答應畀業界一齊搬去茶果嶺，後尾因為當地居民反對至冇咗呢回事。

奇就奇在，當局轉個頭，竟然建議將業界打散，一部分回收商搬去荃灣藍巴勒海峽公眾貨物裝卸區，一部分搬去油麻地，業界當然打死都唔肯接受啦。事實上，業界希望搬埋一齊唔係因為細路仔玩泥沙，想有個伴咁簡單，而係基於實際嘅運作需要。

舉個例，家陣回收業租用嘅內河船有成四十五至五十三米長，但香港嘅泊位一般只係得三十二米，所以業界一直都要守望相助，互借泊位解決問題。假如日後要同其他唔同嘅行業為鄰，未必明白回收業嘅運作模式，好容易惹起不必要嘅誤會同爭拗，最終只會增加堆填區嘅壓力。

再講，搬都要考慮實際情況㗎，呢班高官可能經常出入港島中環區，唔多清楚油麻地嗰度嘅交通係幾咁繁忙，如果再加埋回收業進駐，業界估計每日隨時多五百至八百架次嘅大貨車以及貨櫃車，令到該區嘅交通百上加斤，隨時癱瘓區內交通都有之。

話時話，既然當局可以逼回收商分家，為乜唔考慮將部分荃灣裝卸區租戶搬去油麻地，騰出三個泊位畀佢哋。業界承諾一個月內搬出，海濱長廊工程即刻可以動工，咁就一天都光晒。講到底，港府話就話支持環保回收業，但連咁簡單嘅搬遷方案都搞到一鑊泡，海濱長廊完工無期，當局要負上全責至真。

唔好話功夫茶唔單聲，當局再唔諗辦法拆掂佢，因住官逼民反，逼到回收業要出動罷工手段抗爭，到時香港實聽變成臭港都得嘞！