政府為咗令廣深港高速鐵路工程盡早上馬，不惜以二十億元天價收地及賠償，「利誘」石崗菜園村居民搬走。不過依家仲有三分之一村民堅持「不遷不拆」，話到明就算政府賠幾多都冇得傾。不過，一直喺收地事件上居中斡旋嘅行會成員兼鄉議局主席發叔劉皇發就好有信心，笑言解決問題唔使出動到飛機大炮。
發叔尋日出席鳳園蝴蝶嘉年華時話：「態度強硬都係講道理啫，都冇戰爭咁緊張，攞埋飛機、大炮、飛彈、坦克先可以解決，所以對解決問題好有信心。」發叔咁胸有成竹，難道已經諗到方法拆局？但佢竟然話：「出年十月先拆，咁長時間，相信要畀啲時間同耐性。」
另外，有新界王之稱嘅發叔舊年計劃喺元朗下白泥興建低密度豪宅、高爾夫球學院和蝴蝶公園，不過畀環保人士批評破壞大自然，結果項目未交上城規會就胎死腹中。發叔上月修改白泥計劃再戰城規會，將佔地面積大減超過三分之一，佢尋日就趁蝴蝶嘉年華乘機推銷白泥項目，大讚建蝴蝶公園有助環境保育，所以希望政府接受批地申請。