香港好多人每日都搭港鐵，不過大家有無試過喺地下鐵碰着他？行政會議召集人梁振英（CY）前日喺網誌上，轉載一位內地網民「咸方包」喺港鐵邂逅CY嘅經歷，事後「咸方包」懷疑自己有無睇錯人。
「咸方包」寫於今年七月廿七日嘅網誌話，CY係特區高官，對佢嚟講「遙不可及」，不過一次偶然機會畀佢喺港鐵撞到，當時列車由中環駛往上環，CY企咗喺「咸方包」同佢友人「鄺同學」嘅對面。
據「咸方包」形容，短短一個站車程中，佢見到CY拎條深藍色手巾仔出嚟掩住口鼻打噴嚏。一個平凡不過嘅動作，竟然令「咸方包」覺得CY洋溢「Gentleman（紳士）」氣質，事後感想係「堂堂一個知名人士，坐擁成千上萬甚至過億身家的人，居然坐港鐵」，甚至令佢懷疑嗰位究竟係咪CY。
CY無講「咸方包」見到嗰位係咪佢，只係話自己經常搭港鐵，都係貪其快、方便兼環保，只係好多人都唔信啫。CY不妨喺繁忙時間搭多啲港鐵，相信唔使好耐就大把人信佢啦！