尋日馬場擠滿高球好手，皆因觀瀾湖兩位太子爺朱鼎健（Ken）及朱鼎耀（Tenniel）做東，招呼老友入場睇盃賽。Ken朱曾創下一桿入洞紀錄，佢細佬Tenniel都唔輸蝕，喺加國多倫多讀完高球管理碩士課程，由鋪草皮學起，試過鋪到十隻手指起晒繭，真係有苦自己知。Tenniel最佳成績打到七十幾桿，同職業球手有得揮。

賽事焦點係第八場觀瀾湖沙田錦標賽，呢場Fit馬雲集，曾勝出多次國際大賽嘅賭王名駒「爆冷」、馬王「好爸爸」等亦有份同場較量，點知兩隻馬均大熱倒灶，賽前冷到飛起嘅「包裝大師」就如有神助，最後仲一支箭衝線捧盃，喺現場觀賽嘅馬主李運強都難以置信，興奮地振臂高呼。

計計數，單係買十蚊獨贏，派彩已有千六銀，和味到笑。口袋多咗百幾萬獎金，李生話，上次贏咗頭馬時都將獎金捐出做善事，今次都唔會例外喎。