四年僅兩次通過

致謝動議係每年施政報告受歡迎程度嘅指標。回顧老董主政首五年，香港經濟低迷，民怨沸騰，期間五份施政報告，九七、九九同○一年嘅致謝動議都得到通過。但係，○五年上任後即侈言強政勵治嘅煲呔曾，入主禮賓府五年，呢個政治窘態不但無改善，情況仲走下坡，過去四年，只得兩年勉強過關，今年嘅致謝動議，按當前形勢睇，被否決嘅機會簡直高達百分之九十九點九，即係話，通過次數衰過老董。

今年嘅施政報告，改善就業交白卷，刺激經濟無料到，最多人談論嘅反而係煲呔曾「慳電膽益親家」醜聞，咁嘅施政報告，市民真係講句：慳啲！不過，煲呔曾想立法會表示「致謝」，佢就唔使諗嘞，用番佢嘅名句：盞諗壞腦！

職工盟李卓人表明，上年因為煲呔曾轉軚將生果金加到一千蚊，令部分民主派議員改變主意支持致謝動議，然而，今年施政報告爛到透，扶貧措施欠奉，又未有提出遏壓樓市措施，就算煲呔曾今次又臨時轉軚「龜縮」撤回慳電膽政策，佢都唔會支持致謝議案。社民連陳偉業亦叫官員慳番啖口水，唔使向佢拉票，咁渣嘅施政報告，佢點都啃唔落咁話。睇嚟致謝動議嘅結局已定，關鍵只係會唔會打破煲呔曾喺○五年創下嘅二十五張反對票紀錄。

致謝動議不獲通過，好醜，不過煲呔曾都唔緊張，佢仲放軟手腳，面皮愈嚟愈厚，做埋最後嗰兩年（如果唔腳痛嘅話），看守政府嘅味道愈嚟愈濃。今次慳電膽事件，唔使立法會通過法例，即係唔使去立法會乞票，致謝動議對政府全無約束性，通過與否，佢都話之你喇。