旅發局主席田北俊失落直選後，焉知非福，多咗時間歎世界。呢個月初趁秋高氣爽，一於約埋幾個政商界老友包括港區人大代表王敏剛、前經濟發展及勞工局局長葉澍堃（Stephen）及立法會議員石禮謙遊蘇杭及黃山。其中Stephen四出搜尋地道美食，大舊石買唱碟，田少同王敏剛仲竟然見到天上有鳳凰出現。
偕葉澍堃大舊石同遊
今次黃山行除咗四條「King」外，原來各自帶埋太座及女友，即係仲有四條「Queen」，八人同行夠晒熱鬧。經營內地旅遊生意嘅王敏剛做領隊，帶眾人由上海玩到蘇杭，欣賞西湖十景。蘇州崑劇威水到被列入世界文化遺產，大舊石唔執輸，買番幾隻崑曲碟學唱戲。
有食神之稱嘅Stephen就要食盡地道杭州菜。龍井蝦仁、樟茶鴨及炒菜喺香港嘅杭州菜館都有得食，不過喺當地又別有一番風味，Stephen起筷前仲搵埋大廚出嚟傾吓烹調心得，鬼咁認真。
四Pair人又去遊覽被列入世界文化遺產之一嘅安徽西古村。據講呢條村有六百幾年歷史，王敏剛早前將村內一間祠堂活化成一間設有幾十間房嘅新行館，月前新開張，眾人一於試吓新床鋪，瞓一晚後翌日晨早五點登上黃山睇日出。
寓意政壇東山再起？
今時今日遊黃山已經有吊車，不過由山腳行去吊車站依然要廿分鐘，初登黃山嘅大舊石同Stephen一於坐「山兜」，慳番腳骨力。田少未行過黃山，但佢堅持輕輕篤住拐杖行山欣賞風光，王敏剛一於陪佢行。辛苦果然有回報，田少行到去黃山頂峰時抬頭望吓日光初現嘅藍天，赫然發現一抹如鳳凰般嘅彩霞，王敏剛嘗試去解讀，話「火浴鳳凰，更精彩也」，叫田少要好似火鳳凰咁，喺政壇重整旗鼓，東山再起。
眾人返回西間行館時，有位客人毛遂自薦上前打招呼，原來佢係諸葛亮第四十四代後人諸葛沛，係位名書法家，擅長書寫細到好似一粒米嘅字體，諸葛沛即席揮毫露兩手，四位男士都話大開眼界。四日三夜行程，奇遇認真多。
卓妮