不過，呢個止痛嘅方法就嚟行唔通咯，日後如果夜麻麻搵勻成個區嘅便利店，竟然搵唔到止痛藥嘅話，唔使大驚小怪，因為便利店賣止痛藥可能成為歷史。事關藥物監管制度檢討委員會日前公布多項建議，計劃加強監管出售藥物，連售賣或者批發包括止痛藥、維他命丸甚至漱口水等非毒藥藥物都要申請牌照，即係話，便利店、雜貨舖以及油站等，遲啲想售賣止痛藥就冇咁易喇。此外，委員會又建議註冊藥房必須全日有藥劑師當值，仲提出本地藥廠要喺四至五年內達到國際水平咁話。

恕功夫茶孤陋寡聞，唔通近年來當局發現好多年輕人索漱口水索到上腦、啪維他命丸啪到條條fing？如果唔係，點解會將呢啲咁普通嘅產品納入監管範圍呢？唔通便利店真係要二十四小時戙個註冊藥劑師喺度，先至可以賣止痛藥及漱口水？

冇錯，近年來藥物事故鑊鑊新鮮鑊鑊甘，加強藥物監管係人都舉腳支持，但都要切合實際需要，唔可以咁超現實吖嘛。病人互助組織副主席張德喜就講得啱嘞，監管藥物唔應該影響大眾民生，否則只會弄巧成拙。

再講吖，據業內人士指出，藥劑師月薪閒閒地要三、四萬元，增聘藥劑師一定會令到成本大增，最終會轉嫁落消費者身上，要畀多啲錢買貴藥，講到底，咪又係小市民受害。

況且呢個委員會可能唔知道香港藥劑師人數嚴重不足，如果要落實建議，要再多三分之一藥劑師至搞得掂。弊在當局做一半唔做一半，掟咗個建議出嚟就關人個關，完全冇諗過人手及資源分配，成個建議不切實際，根本就係得啖笑。

所以話，呢個政府應做唔做，唔應做嘅就做到加零一。呢嗱，現時本地廿五間「良好藥品生產規範」（ＧＭＰ）藥廠一直由藥劑師做授權人，委員會竟然反其道而行，建議非藥劑師都可以做授權人，簡直係開歷史倒車。

大家都知喇，依家由藥劑師做授權人都經常出事，日後由非藥劑師做授權人，豈不是更加亂晒龍？唉，仲話叫藥廠四至五年內要達到國際水平喎，真係唔使旨意呀，咁樣搞法，到時藥物事故唔長爆長有至奇咯。

唉，當局一係唔監唔管，一係矯枉過正，叫人無所適從，不如監管吓自己，唔好再山草藥，噏得就噏仲好啦。睇怕小市民都要自求多福，居安思危，儲定漱口水、止痛藥至得咯。