喺內地偏遠地區做免費手術治盲嘅「健康快車」流動眼科火車醫院，尋日搞咗個慈善跑籌款，估唔到呢個喺科學園舉辦嘅活動，竟然「皇氣」鼎盛，保安局局長李少光、海關關長湯顯明、入境處處長白韞六、消防處處長盧振雄、懲教署署長郭亮明及警務處處長鄧竟成等各紀律部隊嘅第一把交椅齊齊去撐場，連內地公安部原常務副部長、中國警察協會理事主席田期玉都係席上客。
據聞田期玉係「中華健康快車」基金會副理事，今次專程嚟港為活動主禮，田期玉見個活動咁有意義，於是搵埋啲「老友記」來撐場，好似廣東省政協副主席兼省公安廳原廳長梁國聚同光哥嚟支持，順便敍吓舊。
光哥鎮守保安局多年，之前又係入境處阿頭，同田期玉、梁國聚兩人係十幾年知交，兩人退下來之後，光哥一直繼續同佢哋保持聯絡，好似上個月訪京同穗，局長都有同兩位「老領導」見面。
尋日共有一千五百人參加慈善跑，分三批跑十三點八公里、五公里同慈善步行三點八公里，共為健康快車籌得超過一百二十萬元，光哥同咁多位紀律部隊阿一仲個個身體力行，用差唔多四十分鐘行完整個慈善步行。尋日天氣都算幾熱，不過走畢全程，幾個大Sir都唔見汗流浹背，個個仲四萬咁口，唔知係咪行會通過咗紀律部隊加人工，所以精神特別爽利？