Jaime同太太分開咗，恢復自由身，Victoria跟佢一齊生活，佢就變身做帶子洪郎。Victoria今年無再讀國際學校，跟中央派位考入跑馬地間聖保祿小學讀小一，尋日正係學校嘅賣旗活動。雖然Victoria仲係有少少怕醜，有時唔係好敢出聲，但就同Jaime兩父女拍住上，Victoria負責貼，爸爸負責拎旗袋，一朝成功咁賣咗兩大版旗。兩父女沿途仲幫其他賣旗嘅公公婆婆買番旗，最後貼住十支旗走添！雖然要晨早起身，但佢哋都話行得好開心，覺得好有意義。

好多有經濟能力嘅父母，鍾意將仔女送去國際學校讀書，Jaime就選擇還原基本法，送番囡囡去傳統學校讀書。Jaime話，間學校同以前嗰間好唔同，除咗定期有親子活動，仲有好多功課做，每日平均都有六樣功課交，所以佢一有時間就會陪Victoria做功課。不過佢呢排太忙，囡囡成績就退步咗少少，雖然保持到七十分左右嘅水平，但為咗幫Victoria打好基礎，佢已經請定補習老師，但就要犧牲Victoria嘅學琴時間嘞。