煲呔曾慳電膽益親家單嘢搞到滿城風雨，有人仲將事件同前財政司司長梁錦松偷步買車單嘢相提並論，久未露面嘅阿松尋日應港大畢業同學會教育基金邀請，出席一個有關發展香港成為教育樞紐嘅圓桌會議，阿松一出場就好幽默介紹自己係一個「二五仔」，此話一出全場Ｏ晒嘴，唔通佢想話煲呔單嘢係佢爆大鑊嘅？
非也！原來阿松係話，自從佢做咗百仕通集團大中華區主席後，成日要返大陸處理業務，逢星期「二」離開香港，星期「五」飛返嚟，想唔做二五仔都唔得啦！做完二五仔都未夠，阿松仲話自己係「三少」，即係少理論、少參與教育事務同少喺香港，雖然係咁，曾經做過教統會主席嘅佢，喺會上分享佢對教育嘅睇法仍然好有睇頭，佢話教育對政府係一項投資，唔係開支，辦得好教育，先可以提升社會經濟效益。
○三年爆出「偷步買車」事件後，當時做緊財爺嘅阿松，與煲呔曾都係特首熱門，但最終因買車事件黯然離開政壇，對於邊個爆呢單嘢，當年都有好多揣測。近日煲呔曾啲醜聞愈揭愈臭，包括慳電膽風波，問阿松點睇呢單醜聞，佢就話自己成日唔喺香港，對件事唔了解，仲話自己「不在其位，不謀其事」，連財政政策都唔肯評論。所以話，「塞翁失馬，焉知非福」！