不如先講講乜嘢係蜉蝣吖。蘇東坡有一首詩係咁嘅：寄蜉蝣於天地，渺蒼海之一粟，哀吾生之須臾，羨長江之無窮。意思係自比蜉蝣，哀嘆人生苦短。

蜉蝣呢種昆蟲又確係好鬼死得意，幼蟲潛伏幾年時間千辛萬苦蛻變為成蟲，之但係一到成蟲階段，口部即刻退化，冇得食又冇得飲，唯一任務就係一日之內談情說愛傳宗接代，然後香消玉殞瓜老襯。功夫茶有少少好奇，有冇部分蜉蝣死前會出現求愛不遂嘅尷尬情況嘅呢？

好嘞，言歸正傳，家陣電子產品有幾短命？環保組織地球之友做過調查，原來香港年輕人平均不足一年零八個月就會更換手提電話，有一成受訪者換機速度快至一個月。

後生仔女點解換機換得咁頻密？六成受訪者話喎，換機原因係壞機，一成八純粹想換新款。地球之友就認為嘞，消費者貪新厭舊，加上生產商不斷推出新款手機，將手機從必需品變為潮流產品，令手機壽命愈來愈短，製造大量電子垃圾。所以佢哋促請政府盡快立法，推出管制電子垃圾嘅生產者責任法規。

唉，蜉蝣瓜老襯，就話會化作魚糧啫，手機瓜老襯，你估會變成乜吖？答案係一大堆劇毒化學物質。

新界地區有好多電子垃圾處理場，堆積大量殘舊電腦顯示屏、電視、電路板等等廢物，環保組織綠色和平做過化驗，發現土壤極可能已經被電子垃圾嘅重金屬污染。其中，鉛屬於劇毒重金屬，能夠影響人類神經、內臟功能同埋血液系統，而溴化滅火劑就會影響肝臟、生殖功能以及干擾賀爾蒙分泌。由於電子垃圾處理場周圍有民居、農場以及小溪，重金屬容易跟隨雨水沖刷流入泥土同埋河流，從而損及居民。一句講晒，電子垃圾危害健康！

香港有冇妥善處理電子垃圾嘅環保條例嘅呢？有冇嚴格監管嘅環保措施嘅呢？不如咁講啦，環境局局長邱騰華成事不足敗事有餘，淨係推出一項慳電膽政策已經搞到滿城風雨，作為佢老頂嘅曾蔭權更加以環保之名涉嫌明益親家，靠呢兩個孖寶兄弟去搞環保喎，瓜得啦，老襯！

電子產品朝生暮死，環保政策半死不活，最終會有乜嘢後果？計功夫茶話齋，打造環保優勢產業應該冇乜可能㗎嘞，不如退而求其次，求神拜佛希望孖寶兄弟唔好再添煩添亂，你知啦，電子垃圾何其多，亂搞環保必惹禍！