煲呔曾份《群策創新天》嘅施政報告，劣評如潮。香港社會面臨的困境多多，尤其貧窮人口上升、青少年失業問題、醫療問題（如割白內障要排六、七年）……然而，煲呔曾好搞唔搞，派慳電膽現金券，可惜搞到「益親家」涉利益輸送咁大鑊，如今又被環保團體踢爆：兩度警告要小心避嫌，可是佢冥頑不靈，一味話現有申報機制無規定，言下之意，「瓜田李下」唔適合用喺佢身上！
早兩日，煲呔曾又喺︽香港家書》大發謬論，話要推動經濟「升呢」，撒手鐧只有「知識」同「創新」，簡而言之，就係「食腦」。可惜慳電膽現金券的兵行險着，再次證明佢施政不派糖不扶貧，只派慳電膽現金券係冇腦，甚至壞腦！亡羊補牢，如不趕快腰斬此「食腦」偉大構思，來個自我「升呢」，老朽恐其「做唔好呢份工」。
《資治通鑑》卷八十一有則典故，大意話晉武帝於正月舉行祭天大典，把一切禮節都合式的鋪排完了，躊躇滿志，嘆了一口氣，問在側的大官司隸校尉劉毅說：「我可以比漢朝的哪個皇帝？」劉毅答：「桓帝和靈帝。」桓靈二帝乃亡國之君，唔衰嗰個都唔攞出來比，晉武帝當堂面都白：「何至於此？」劉毅答：「桓靈二帝賣官錢入官庫，你呢？填私房。這樣比來，你還不如呢。」
晉武帝碰了釘，還保持風度笑說：「桓靈的時候，聽不到這話，我有你這樣的直臣，比他兩位強一點。」
煲呔曾的「心實塞」謀臣獻策之士雖多，就是欠了一個肯講真話的劉毅！個個表面話做好份工，內心渴望的，卻是保住份每月幾十萬元嘅人工！