滙豐亞太區主席鄭海泉將於明年二月退下火線，出任滙豐中國董事長及台灣區主席一職，專注中國及台灣業務，以配合愈來愈緊密嘅大中華地區經濟發展。鄭大班尋日一支公去香港會食飯，佢話近日往來北京開始頻密，配合明年二月正式履新，仲話到時會舉家返內地定居都唔出奇，事關太太已答應到內地居住，果然係夫唱婦隨！
以前有人大彈鄭大班嘅普通話唔係好掂，在內地生活或會增加障礙，但鄭大班就鄭重澄清：「係啲傳媒話我啲普通話唔得之嘛，其實我聽同講都無問題，完全溝通得到喎！」北方天氣比香港凍好多，又落雪，當地人好鍾意食饅頭，唔知鄭大班又做好準備未呢？佢就好樂觀咁話：「人總要習慣吓嘅，況且內地乜都有得食，生活應該無問題。」
中國地大物博，風光名勝總有一處喺左近，長駐內地放假去玩點都着數啲，但鄭大班話內地好多地方已經去過，住落先至再計劃去邊度玩。