有美食天堂之稱嘅香港造就唔少飲食界巨子，美心第三代揸Fit人伍偉國及大家樂揸Fit人陳裕光各自喺飲食業闖出一番成績，但原來兩人都經歷過慘痛教訓。伍偉國話，美心最大嘅挫折係開設卡通主題餐廳；陳裕光就直言九十年代初太急於進軍內地，換來徹底嘅失敗。
香港總商會喺新鮮出爐嘅《工商月刊》中專訪兩人，兩人大談成功要訣。伍偉國自爆好捱得，加入美心初期做過送貨、樓面及收銀；佢又出名鐵面無私，對爛賭廚師毫不留手；更堅持唔僱用王親國戚，免得有人私相授受。喺伍偉國領導下，美心飲食王國已擴展至五百四十幾間分店。不過伍公子亦有打敗仗嘅時候，話說十二年前集團開設一家Hello Kitty餐廳，雖然首年賺到八百萬元，但熱潮退卻後，第三年竟然虧蝕八百萬，其後再開設超人餐廳一樣蝕錢，佢得出結論係：「千祈唔好經營卡通主題餐廳，因為客人係為卡通人物而來，唔係為品嘗食物。」
坐擁四十四億元身家嘅陳裕光亦同樣有過失敗經歷，佢話大家樂最大嘅失誤係太早進軍內地市場，由於當時需要進口大量嘅原材料，每個餐定價高達三十五元，呢個價超出當年內地人嘅消費力，結果生意慘淡收場，呢個教訓買得真係大囉！