煲呔曾被揭發涉嫌以慳電膽現金券益親家風波，娥姐大刀闊斧放寬工廈發展，亦惹來官商勾結批評。娥姐尋日上電台呼冤，話當局在研究活化工廈期間，唔少地產商收到風後，即時向政府施壓，要求唔好推得咁大力度，事關受惠嘅工廈涉及過千幢，擔心將來多咗商廈樓房供應，會拉低晒啲商廈樓價及租金。

已改裝恐跌價減租

如果話工廈影響商廈樓價，都係言之尚早，最弊係呢班地產商有部分之前已經畀咗錢政府申請改裝或重建工廈，申請程序可謂「過五關斬六將」，但現時竟然話新政策下連一毫子都唔使畀，等於眼白白睇住之前畀咗嘅錢掉晒落去鹹水海，唔火滾有鬼啦！所以地產商向娥姐反映意見確係理所當然。

有業界知情人士話，現時確實有好多工廈已經變身做商廈，未能受惠於新政策之餘，亦要面對將來商廈增加供應帶來嘅租金和樓價下調壓力，但有人快樂有人愁，手上有工廈嘅地產商將會受惠於新政策。該業界人士形容，娥姐今次大刀闊斧活化工廈，做得相當徹底，等於將商廈供求來一次大洗牌，租開丙級寫字樓嘅租客，將來可能流向租用工廈變身後嘅商廈，租開乙級寫字樓嘅亦可能流向丙級，如此類推。

娥姐喺電台上仲話，自己早前接受訪問提到工廈發展時，已經提及希望地產商目光要遠大啲，唔好只顧自己利益，要顧及香港整體發展，點知仲要繼續畀人批評官商勾結，明益地產商，心中不是味兒，不吐不快，但估唔到嘅係娥姐為保清白之身，不惜擺地產商上枱，仲用到「施壓」兩個字添！娥姐一直被傳為下屆政務司司長熱門人選，莫非佢唔怕破壞同商界嘅關係？