晚宴主角臨時甩底，據聞有啲答應出席嘅嘉賓甩埋底，原定七圍枱縮到得番四圍半，其中一圍枱仲要係畀負責演唱嘅歌手同樂隊坐，實際上出席嘅「曾朋友」估計只有三、四十人。據聞晚宴主要由「煲呔針」鄭經翰籌備，赴宴者有現任及前任高官、中聯辦高官、部分行會及立會議員，以及一些商界人士（見表），據聞原本有大孖沙答應出席，最後冇現身。
搞手辯稱普通飯局
財政司司長鬍鬚曾、金管局總裁攞命陳以及只得太太同兩個仔出席嘅東亞銀行主席李國寶，都係公認嘅煲呔曾「真朋友」。立法會議員方面，就只見經濟動力嘅林健鋒（Jeffrey）、梁劉柔芬（Sophie）同專業會議嘅石禮謙，Jeffrey同Sophie尋日仲力撐煲呔曾嘅慳電膽醜聞冇問題！當然，邊啲係煲呔曾嘅真正朋友，只有佢知道。
呢班「曾朋友」前晚被突然撞破，好多不知所措，有說「同嘉賓食飯」，有說「同自己朋友食飯」，有說「啱啱試完馬」，但過咗一晚，尋日幾乎統一口徑，搞手鄭經翰話，只係班政商界坐埋食飯吹水，七月內地HiFi歌后陳潔麗來港請過佢到場表演，尋日就請童麗。Jeffrey同Sophie仲搞爛gag，前者話晚宴係慶祝佢五十七歲零三百六十日壽辰，好似驚死人唔知佢就嚟生日；後者更自爆佢同老公梁孔德今年都係結婚四十周年，前晚亦有人恭喜佢哋，真係愈描愈黑！餐飯原本由鄭經翰埋單，但依家曝晒光，每人要夾千零蚊找數。鄭經翰又澄清，班嘉賓一抽二抽用袋裝住嘅，係紅酒唔係禮物。特首辦又澄清，煲呔曾前晚人冇到，亦冇收禮。
議員大班面紅駕車
煲呔曾當晚放飛機，大家依然盡興。政務司司長唐英年、保安局局長李少光、前商務及經濟發展局局長馬時亨、候任滙豐銀行亞太區行政總裁王冬勝、大舊石同Jeffrey，散席時都飲到滿面通紅，其中王冬勝同Jeffrey仲夠膽揸車離開。本身有揸車到場嘅肥亨就做精明駕駛者，改坐鄭經翰座駕離開，大舊石就由女友Lisa揸車，黃楚標坐埋佢嘅車走。
卓妮