嗱嗱嗱，據「東方報業民意調查」顯示，三成受訪者直指對六大產業冇信心，擔心會流於空談；兩成六批評六大產業遠水不能救近火；兩成一質疑發展教育及醫療產業，未符合本港實際情況。

好心啦，係人都知六大產業好多都係十畫都未有一撇，求求其其將啲舊料炒埋一碟，以為可以敷衍頂住檔，小市民又點會咁易被蒙蔽到吖。調查顯示有兩成八受訪者唔滿意施政報告只係講遠景，忽略咗短期紓緩措施；兩成七形容報告空洞冇新意；兩成四就話商業味太重，民生措施着墨太少。

話時話，呢份報告一味只係高大空，對小市民最切身嘅困苦就視而不見。香港係亞洲區貧富懸殊最嚴重嘅地區，冇工做嘅當然苦過弟弟，有份工都唔好得幾多，家陣有十九萬個在職貧窮家庭，好多要去食物銀行攞嘢食㗎咋。

當局把口就話會利民紓困，但口爽荷包立，施政報告喺呢方面嘅支援完全欠奉。三成七受訪者直斥政府漠視在職貧窮及貧富懸殊問題日益嚴重；兩成二指對弱勢社群支援不足；兩成一直斥政府施政報告關懷不足，幫唔到基層市民紓困。

呢嗱，關注綜援檢討聯盟組織幹事李大成就講得啱，佢話上一份施政報告已經係「漠視」基層市民嘅問題，今次仲變本加厲，直頭係「無視」低下階層生活係幾咁困苦添，真係一矢中的。

其實唔止低下階層冇受惠，好多中產人士話呢份報告完全冇提及點樣解決佢哋面對嘅裁員、失業問題。三成三受訪者話對報告冇創造就業感到遺憾；兩成九批評當局根本冇心解決失業問題；一成九擔心失業率會持續高企。

弊在施政報告有正正經經嘅扶貧紓困唔做，搞埋送慳電膽呢啲捉蟲嘅嘢出嚟，卒之搞出咗個大頭佛，仲爆埋曾蔭權涉「益親家」嘅利益輸送醜聞添，真係唔衰攞嚟衰。三成一受訪者認為，未必所有家庭都用到慳電膽，效益存疑；兩成八直斥幫唔到市民減少電費支出；兩成七就話政府變相將慳電膽費用轉嫁畀小市民。

唉，呢份報告涼薄成咁，喺紓困上交白卷，低下階層全冇得益，中產又冇受惠，難怪市民嘅評價認真麻麻，有學者認為如果十分滿分，呢份報告只係值三分！事實上，今次調查有三成九受訪者指報告唔合格；兩成四甚至畀好低分，只係得兩成一認為合格咋。

計功夫茶話齋，呢份報告都有成功嘅地方嘅，就係成功搞到民怨沸騰囉，幾乎日日都有市民去政府總部抗議。再係咁落去，民怨谷谷埋埋，睇怕最後只係得番「官逼民反」呢個產業。