電腦聲評歌藝

卡拉ＯＫ由日本人發明，面世二十幾年，早已經冇乜新嘅變化，近年日本卡拉ＯＫ系統生產商，引進新科技，就係用電腦對你嘅歌藝即時評分，而且評級到達專業水平，本來呢啲高科技早就有，但好少應用喺卡拉ＯＫ場。生產商咁辛苦攞得專利，如果就咁幫客人打分，似乎冇乜新鮮感，於是生產商再加啲新意思，當唱K者唱完歌之後，電腦就會即時評分，然後就會發出人聲，點評唱K者嘅歌藝同分數，就好似參加歌唱比賽一樣。

為咗加添趣味性，所收錄嘅人聲，好多都係日本嘅喜劇演員或者真係做歌唱比賽評判嘅嘉賓，所以當你去唱K嘅時候，真係好似參加電視歌唱比賽一樣，而且電腦仲可記錄成晚邊個唱得最好，埋單時有獎品送畀你。

罰剝衫最刺激

呢個卡拉ＯＫ系統有賞自然有罰，至於罰方面係有得揀嘅，例如罰飲酒、罰彈鼻哥、罰畫大花面、罰綁辮仔，但最受歡迎嘅竟然係罰剝衫，如果選定咗罰剝衫，電腦可以按表現罰剝一件，差嘅罰剝兩件都得。我哋搵嚟安裝咗呢個系統嘅卡拉ＯＫ店長白石先生，講解吓點解剝衫卡拉ＯＫ會咁受歡迎。白石話：「年輕人貪刺激嘛！你話一大班年輕男女，有乜嘢好玩得過鬥唱歌而令對方剝衫呢？所以自推出後大受玩家歡迎。」

咁啲年輕人真係會剝光豬咩？白石話：「女仔通常輸淨條底褲就當輸，好少剝光豬，但男仔就經常玩到連底褲都剝埋，有時仲玩到要行出房，繞場一周都有，睇見佢哋玩得咁高興，我哋都戥啲年輕人開心。」

內衣唱更投入

咁樣剝光豬會唔會畀人拉呢？白石話：「撞啱查牌都會架！但情況好少。」咁會唔會引起啲風化案件呢？白石話：「存心非禮強姦就冇發生過，但有啲輸咗唔認帳，之後畀人剝佢光豬而嘈交嘅，就經常都發生。」只係着住內衣褲嚟唱歌，唔知係乜嘢味道嘅呢？白石話：「佢哋會唱得更加起勁，一啲都冇話怕醜怯場，因為如果呢個回合再出錯，就會畀人剝光豬，所以着住內衣褲嚟唱，佢哋往往畀平時唱得更好更投入。」

所以話只要肯花心思，就可以化腐朽為新奇，唱歌畀分器早就面世，但一直唔普及，就係欠個好嘅包裝，家陣有人將佢改頭換面，就能殺出一條血路，而且深受年輕人歡迎，睇嚟更會令唱K業光輝多十年八載添。

撰文：小德