近日傳出東亞運動會有「跳水公主」郭晶晶、「欄王」劉翔等星級國手來港作賽，搞到一眾政商界名人撲飛都撲唔切，就連東亞運籌委會主席霍震霆都冇特權，一樣冇多餘門券可以派畀人。不過，當大家諗緊點樣舌累啲飛返嚟之際，立法會秘書處日前出咗張通告通知議員，東亞運籌委會喺每場賽事預留三個名額畀議員觀看。
有興趣睇比賽嘅議員只須喺最遲聽日填番張回條，講畀秘書處知佢哋想睇邊一場就可以獲發門券，如果申請人數太多，將會由立法會秘書長吳文華抽籤決定名額誰屬。
今次東亞運，好多賽事嘅門券一早已經賣斷市，包括標準舞拉丁舞賽事。立法會議員陳淑莊（Tanya）聽到有免費飛都不知幾開心。Tanya話，大概喺九十年代尾佢仲喺投資銀行打工嗰陣，曾經一度迷上標準舞，之後仲潛心練舞幾年準備參加比賽，但後來佢轉行做大律師，由於實習嗰幾年實在太忙，最終被迫放棄「習舞」，所以佢今次一定唔會錯過機會，申請門券入場觀摩舞林高手過招。