Tommy有孫萬事足，講起孫仔就甜到漏，張太已第一時間飛去陪囡囡坐月，但太太嫌Tommy阻頭阻勢，唔畀佢去，加上施政報告出台，火頭特別多，諗諗吓都係唔行開，留喺香港坐鎮。不過囡囡及身為醫生嘅女婿好識做，每日透過視像會議，將孫仔嘅一舉一動傳送畀千里之外嘅Tommy，等佢望孫止渴，Tommy已透過太太送禮賀孫仔出生，送乜就保持神秘。

咁孫仔似邊個呢？Tommy話暫時未知住，不過睇見孫仔首次睜開眼仔，感覺好趣致，遲啲無咁忙，一定會飛去美國學吓餵奶湊孫。查實呢排抱孫嘅政界中人仲有保安局局長李少光，光哥講明要親自幫孫仔改名，咁Tommy呢？佢聽見改名就耍手擰頭，話孫仔係外孫，改乜名唔輪到佢話事喎。