領導人二代如今喺內地各領風騷，早前建國六十周年慶典上，前總理李鵬孫女蘭蘭都有曝光。外貌標致且身形高挑嘅蘭蘭與中國女電王媽媽李小琳生成同一餅印，蘭蘭「電力四射」，同中國第一線名模有得揮。
長得亭亭玉立嘅蘭蘭喺公眾場合向來絕少曝光，早前喺北京閱兵儀式上，就罕有地拍住媽媽齊齊亮相，呢個場面畀全國政協委員兼美容天后鄭明明撞到正，皆因明明姐同小琳係閨中密友，經常結伴行街扮靚。不過明明姐話，佢都係第一次見到蘭蘭真人，事關呢位擁有九級鋼琴底子嘅千金小姐早年喺英國留學，近年至返回上海深造咋。
蘭蘭深得媽媽遺傳，除咗高度更優勝外，不論面形輪廓、皮膚、身形及眼神都似足媽媽，簡直係李小琳嘅「複製人」。蘭蘭影相時叉腰擺甫士，型格十足，難怪明明姐話佢有晒做名模嘅潛質。
明明姐近年喺內地營商有道，打通晒內地政商界脈絡，佢喺香港嘅投資一樣報捷。早前斥資七千多萬元購入尖沙咀河內道天價豪宅名鑄三個高層海景單位，持貨個幾月，已升值唔少。