慳電膽醜聞直接動搖特區政府嘅誠信，所以一眾高官呢幾日頻頻出席公眾活動，開腔為煲呔曾護航狡辯，勤力救火。先有環境局局長邱騰華爭住將件事攬上身，話派慳電膽現金券嘅政策係由環境局提出，之後政務司司長唐英年亦上電台施展一招偷換概念，話煲呔曾唔係受益人，所以毋須申報利益。

正當一眾高官絞盡腦汁諗計幫煲呔曾開脫之際，一直被指係煲呔曾「馬房」嘅鬍鬚曾多日嚟都冇幫口，而且仲有閒情逸致匿喺屋企玩狗兼寫感謝卡。鬍鬚曾尋日喺網誌寫咗一篇名為「談狗」嘅文章，提到佢早前急性心臟病入院時令身邊嘅人擔心，所以佢用屋企隻柴犬Oliver作模特兒，印製一張感謝卡送畀各方好友，以表謝意。

千字網誌 不談政治

慳電膽事件令政府陷入管治危機，加上派現金券、加電費等問題同財政息息相關，身為財爺嘅鬍鬚曾喺成千字嘅網誌中，竟然冇片言隻字提及呢件事。成篇網誌淨係介紹曾家嘅養狗歷史同趣事，鬍鬚曾話自己養咗三隻狗，感謝卡嘅主角Oliver係佢舊年送畀個女嘅生日禮物，另外，佢喺美國波士頓住嘅時候，又曾經養過兩隻分別叫Cheshire同Cherry嘅鬆獅犬，不過搬返香港之後，兩隻鬆獅犬就留咗畀佢細佬照顧。

鬍鬚曾近來因病得福，通波仔死過翻生之後民望大升，唔知佢係咪驚出面力撐煲呔曾，會搞到自己衰埋一份，所以寧願封口。事實上，佢大病初愈，絕對大條道理可以不問世事匿喺屋企玩狗兼休養，不過，鬍鬚曾翹埋雙手嘅態度正凸顯問責制下，管治班子各家自掃門前雪嘅心態。令人不禁要問：呢個係乜嘢團隊呀？