星期日，郊遊日，最啱就係去做運動。尋日兩間華仁書院聯合搞咗個校慶慈善步行，由九龍華仁行去香港華仁，中間搭天星小輪過海，唔少政商界嘅名校友都有出席，包括政制及內地事務局局長林瑞麟、教育局局長孫明揚、醫管局主席肥胡胡定旭同合和太子爺胡文新（Thomas）等。
胡文新行過海無難度
由九龍行去灣仔，睇落好似好遠，但就完全難唔到本身係冰曲健將嘅Thomas。尋日天氣都幾熱，佢就帶定維他命Ｃ水補充體力，係行山郊遊嘅正確示範。其實Thomas之前都有唔少長程步行經驗，早排去過甘肅義行，所以相比之下，呢段路佢行得相當輕鬆。
其中一個中途離隊嘅肥胡，行咗無耐就急急腳上車，卓妮八一八先知佢返咗香港華仁排戲。今個星期四、五華仁戲劇社喺演藝學院搞咗兩場英文大戲，秉承一貫華仁傳統之餘，亦都為重建校舍籌款。套戲叫《鴉雀如果作鳳凰》，係講吳越爭霸嘅故事，肥胡喺戲入面做吳國嘅丞相。雖然今次唔係肥胡第一次做英文大戲，不過佢就有啲擔心，皆因佢係大近視，又唔慣戴隱形眼鏡，喺台上無得戴眼鏡，曾經差啲跣親，所以一個丞相用嘅「Fing」腳動作，佢就私下練咗好多次，務求以最佳表現見人。
孖袋巾傑為母校籌款
肥胡除咗親身下海之外，其實仲拉埋其他人落水，嗰個就係立法會議員Alan梁家傑。唔好睇Alan個人咁西化，做起戲上嚟都有板有眼。佢話大戲最難係要跟住鑼鼓拍子做動作，又要做手勢，真係少啲記憶力都唔掂！其實最近鬧出慳電膽風波嘅煲呔曾以前都做過英文大戲，唔知Alan有無興趣同佢同台演出做對手戲呢？Alan就笑笑口話，如果煲呔曾肯的話都無乜所謂喎！如果呢套戲做得成，一定好有睇頭，卓妮到時一定擔定櫈仔睇好戲！
卓妮