老朽相信煲呔曾在制訂施政報告的政策時，唯一考慮是公眾利益。不過，老朽亦知道，權力可以左右人，所以任何人都是權力的奴才；人可以左右知識，所以任何人都是知識的主人。老朽一個人只可單打獨鬥，有事慣咗自己「孭飛」；為了支持煲呔曾不涉利益輸送的嫌疑，決定一收到那張慳電膽百元現金券，即刻焚之。老朽唔做權力的奴才，唔代表唔做知識的主人噃，請聽細析：

老朽一向支持環保，不過，唔會盲目在攝氏三十五度下停車熄匙；如今，更唔想傷害煲呔曾嘅親家，畀人話「官親勾結」，所以唔用慳電膽。

慳電膽含水銀，據說，慳電膽百元現金券推出後，百姓基於「有便宜唔好使頸」的原則，以一百蚊可買三至四個慳電膽，其壽命約一年，一年後料有一千萬個慳電膽被棄置，約產生五十公斤水銀，都話水銀瀉地咯，係人都知會污染環境，即使慳到電費，智者不為也，何況我唯一嘅宗旨就係打救地球！

入正題！老朽焚掉慳電膽百元現金券，唔代表唔環保，只不過改用近年研發的ＬＥＤ環保燈，貴啲啲，但係值囉，一來唔含水銀，壽命亦比慳電膽高好多；當然，最重要係幫煲呔曾避嫌！如果個個好似老朽咁醒，一燒就可保煲呔曾清譽，何樂而不為！