尋日喺理大活動見到潘宗光，無見佢一排，佢成個人瘦咗好多，原來早前佢同一眾志同道合朋友，去咗河北避暑勝地北戴河共修，所謂共修包括打坐、冥想等，目的為減少自己嘅執着、物欲、語言溝通，甚至唔食嘢，齋飲水。起初佢點都唔肯講幾多日無食嘢，話費事講出嚟嚇親人，後來終於透露，竟然有四、五日唔食嘢，佢話修行期間身體消耗少，斷食幾耐可因人而異喎，唔捱過都唔知佢點捱到。

雖然潘宗光放低理大，但就做咗嘉華國際同合和公路基建嘅非執行董事。潘宗光話兩個職位都係朋友叫到，惟有義不容辭去做，好似嘉華國際主席呂志和喺潘宗光退休前一個月，捐咗三千萬畀理大，呂志和想搵佢做非執董，好難推；合和實業胡應湘同理大一樣好有淵源，冇得推，總之佢嘅宗旨就係唔做受薪工作啦！