東亞運動會仲有一個多月就正式揭幕，訪港貴賓名單仍未落實，但歐洲名牌車廠寶馬已宣布出動二百二十部523i型號豪華房車，協助接載來港觀禮嘅政要等ＶＩＰ嘉賓，國際奧委會主席羅格屆時都會嚟。東亞運籌委會主席霍震霆日前與寶馬香港董事總經理郭立榮正式簽約，郭立榮賣花讚花香，大讚寶馬車身堅硬無比，唔使加防彈設計都相當安全喎！
寶馬523i車系走豪華路線，內籠寬敞馬力又足，每部售價五十二萬三千元，二百二十部總值超過一億元。不過，凡新車落地即變二手車，車價水瓜打狗唔見一截，寶馬於是用番一貫做法，將批名車以筍價八折轉售畀客人，由於批車在接載政要期間唔使出牌，所有車主可以全新車出牌，再轉售都值錢啲。
正因為價錢咁筍，寶馬早前推出預售後反應極佳，二百幾部名車已賣得八八九九，訂咗貨嘅車主可以喺東亞運動會閉幕後一星期，即係大約在十二月二十日左右就可以攞車嘞！