仕途曾遭打擊

阿松喺○二至○三年度預算案宣布調高汽車首次登記稅前買咗架新車，但就冇喺行會討論加稅時申報利益，涉嫌偷步買車避稅。其後阿松自爆當時擔任佢新聞秘書嘅Raymond，喺事件曝光前曾經坐過佢架新車，但都冇提佢申報。事後好多官場中人除咗批評阿松自己有問題外，亦質疑Raymond點解咁唔醒目冇點醒老細，甚至懷疑唔知係咪有人想跣阿松一鑊。

Raymond事後亦不諱言該次事件對佢嘅仕途造成影響，比起好多同期嘅政務官升得慢。好多人更認為Raymond後來決定脫離公務員隊伍，冒險做「白老鼠」出任首批政治任命副局長，多少都同佢孭咗呢隻黑鑊有關，希望可以轉個身份「洗底」重新上路。

不過，Raymond出任副局長僅一年多啲，就獲煲呔曾賞識升做特首辦主任，薪酬比佢之前做副秘書長時三級跳，以為佢終於行完衰運「守得雲開見月明」喇。點知佢正式升職唔夠兩個月，佢嘅新老細立即又爆出同偷步買車好相似嘅慳電膽醜聞，想唔話佢黑仔都唔得。

Raymond做特首辦主任之前，講過買車事件令佢「經一事、長一智」，以後會小心處理同類事件，點解佢今次又冇提醒老細申報呢？政府消息就話，有參與今次決策嘅各級官員，事前都唔知煲呔曾親家原來做慳電膽，自然冇人識得提佢。如果呢個係事實，Raymond就真係黑過墨汁喇！

堪輿學家麥玲玲話，做下屬嘅成日累老細孭鑊，大部分係五行或者生肖唔夾，亦有少數人天生剋老細，外貌特徵包括耳仔尖同額頭凹陷等；如果個下屬真係好有料，但又唔夾自己，可以考慮唔搵佢做直屬副手，喺中間搵多個人隔一隔佢嘅煞氣；亦有啲情況係個老細嘅「奴僕宮」生得唔好，搵乜人做下屬都係「二五仔」或「佗衰家」，咁就唔關人哋事喇。