本文重點
特區政府授勳向來被視為分餅仔遊戲，做得好分件餅無乜所謂，但好似食物及衞生局局長周一嶽呢啲撞板多過食飯嘅庸官，任內頻頻發生醫療事故，不少人枉送性命，最終竟然獲頒金紫荊星章，認真離譜！煲呔曾日前被揭發推銷慳電膽涉嫌益親家醜聞，多名獲授勳嘅高官都封口唔敢講嘢，做晒鵪鶉！
司局長避談煲呔曾
尋日喺禮賓府，無機會見煲呔曾養到甩色嘅錦鯉，只見一群封晒口嘅高官。好似政務司司長唐英年，一見傳媒就雞咁腳鬆人。同獲金紫荊星章嘅政制及內地事務局局長林瑞麟，都係乜都唔講。升格做爺爺嘅保安局局長李少光都攞咗金紫荊星章，雙喜臨門，佢都係話唔想講太多嘢。
唯一敢企埋記者區講嘢嘅周一鑊就話深感榮幸，又感謝市民對當局政策嘅支持，真係唔知「醜」字點寫。問到政策問題，佢話呢個場合唔係太適合講，有咩等星期三喺立法會再傾，真不知道佢何德何能攞金紫荊星章！
卓妮