本文重點
禮賓府尋日舉行授勳儀式，不少名人一家出席，當中最高興可以說是獲頒金紫荊星章嘅玩具大王蔡志明及獲頒大紫荊勳章嘅金管局總裁任志剛。蔡老闆大女加敏嘅愛駒「靚到爆」在周三夜賽奪冠，尋日蔡老闆受勳後，佢細女加怡嘅愛駒「萬能駒」又贏馬，獲獎金三十五萬，一星期內三喜臨門！
蔡老闆尋日同太太李惠莉、大女加敏及兒子加讚一齊出席授勳儀式，但高興之餘，仲笑謂自己係「沙田第一金」，即係首個沙田居民獲金紫荊殊榮，係對過去嘅公益事務最大嘅肯定。佢話夜晚一家人會去沙田食飯慶祝。據聞蔡老闆擔任名譽會長嘅沙田各界活動委員會，亦準備下月初筵開六十席，為蔡老闆及會內其他受勳人士大肆慶祝，實行與眾同樂。
肥亨獲市民支持感光榮
至於剛卸任金管局總裁嘅任總，風采依然，獲頒大紫荊勳章後不斷同傳媒揮手，與太太及一對子女任影唔嬲，又走到記者區回答問題，任太仲笑笑口透露稍後會去日本旅行添！獲頒金紫荊星章嘅前商務及經濟發展局局長馬時亨，由於兩個囡囡各有各忙，所以只係得太太王培琪陪佢出席。肥亨話受勳感到好光榮，代表過去六年為官期間市民對佢嘅支持。
青少年事務委員會主席陳振彬就話，獲頒銀紫荊星章覺得非常開心，因為係對佢擔任公職嘅認同；同樣攞銀紫荊星章嘅福建幫頭領盧文端，尋日就同囡囡盧金治以及囝囝盧金榮，一起出席分享喜悅。獲頒榮譽勳章嘅香港青年聯會主席許華傑就話，已故嘅爸爸許長青都獲頒過勳章，佢會整個靚盒裝起呢兩個勳章，得閒攞出嚟欣賞。
黃楚標買相機影外父
深圳東海花園老闆黃楚標，知道外父黎維鑫獲頒榮譽勳章，特別買部新出嘅單鏡反光相機充當攝影師，幫外父影相。標哥咁錫個外父，難怪太太笑晒口啦！
卓妮