本文重點
【本報訊】網民繼續熱烈討論曾蔭權以慳電膽明益親家事件，紛紛要求廉政公署和立法會徹查到底，不要讓曾蔭權胡混過關，亦有網民要求曾蔭權問責下台，否則他的施政一定不得民心。
「bigmouth2006」質疑，「香港道德觀念，公職人員守則就係咁樣拖低晒，又側側膊當冇嘢，香港真係冇乜正義？又係唔使問責下台，特首及一眾議員都係千古罪人，真係衰過老董！」
「sad_but_true」指出，「記得梁錦松單嘢？佢自己喺加稅前買車，都要畀ICAC查，跟住劈炮唔做，今次單嘢，潛在利益過億，仲要係利益輸送，官商勾結，我覺得呢單嘢，ICAC一定要查，立法會一定要查，唔可以畀曾蔭權混混下又過關。」
「膠人一名」諷刺地說：「佢真係以為自己喺香港大哂，寫信去要求豁免個仔醫生執業試都做得出，益吓親家咁小事，冇有怕啦！」「J得樂」表示：「有啲嘢叫瓜田李下，以佢以前個底都有呢味嘢，佢自己辭職以正風氣會比較明智，唔係收尾呢幾年佢施政一定唔會得民心。」
「csw667」指出，「LED燈開始流行，連交通燈都用，佢要市民用慳電膽，仲話要一次過買多啲，我想佢幫人清貨多啲。」
網民精句
信長一世：香港陳扁扁下台！
zerotonyhk：曾生依鋪真係玩完……我覺得佢無心，但佢實在太廢！
HK官商勾結：如果佢要坐，是香港法治之區及社會進步表現，等啲高官唔敢官商勾結，換取退休後長期合作。
chris200804：真的希望能讓特首知道……香港市民不要利益輸送。
西門吹雪：明益自己的親家，我寧可不用這張券！