迪士尼去年聘請金民豪嘅時候，佢正擔任中糧可口可樂市務及銷售總監，當時佢好奇怪，點解迪士尼會睇中一個汽水佬，又覺得如果唔認識隻商品，好難推銷得好，於是決定親身視察，同家人去迪士尼玩咗兩日一夜，一家四口都好滿意迪士尼嘅服務，最巧合係金太原來係加拿大移民，以前每年暑假都會去美國加州迪士尼，此行勾起佢唔少回憶，最後間接促成Andrew接受呢份工嘞。

上任一年，Andrew仍在探索港人及內地客嘅喜好，根據佢嘅觀察，香港人最奄尖又最貪新鮮，成日要求有新嘢玩，內地客就影相緊要過玩，佢見過有內地客喺飛越太空山外面影完相就走人，唔知係咪趕時間得滯。尋日Andrew喺美國總商會午餐會同對手海洋公園行政總裁苗樂文碰頭，兩個人都顯得好客氣，話大家都係世界級嘅主題公園，希望一齊吸引遊客嚟香港就好嘞！