不過話分兩頭，假如你係達官貴人，你又唔使咁驚，始終你條命仔特別矜貴，醫護人員會金睛火眼幫你（目及）到實一實，永冇甩拖。譬如話，你係堂堂財政司司長曾俊華，你忽然之間心臟病發，瑪麗醫院會為你提供超一流服務，第一時間通波仔，包保手術順利，然後迅速康復，短短六日即可龍精虎猛出院過中秋。

唔係達官貴人又點呢？咁就要等功夫茶同大家講一個古仔嘞。話說有位七十一歲姓馮嘅婆婆，又係患有心臟病喎，又係幫襯公立醫院喎，又係要求通波仔喎，屯門醫院就同佢講，婆婆呀，排隊啦，排到明年六月應該輪得到㗎嘞。

馮婆婆係今年八月因為心臟問題入院嘅，數數手指，排隊排到明年六月即係要等十個月，老人家捱唔捱到咁耐呀？冇錯，真係捱唔到，馮婆婆喺十月初病情急轉直下，急急送入深切治療部。

更加弊傢伙嘅係，院方似乎無意救人，馮婆婆個仔馮生沅係咁講嘅：「佢（醫生）同我話自己見過一百個咁嘅個案，只有七、八個救得番，而且媽媽年紀大，救番都未必好，所以只會打強心針，唔會做額外嘢。」

嘩！機會少就唔救？年紀大就唔救？咁同明愛醫院見死不救有乜分別？你試下同曾俊華講吖：曾司長呀，你都年紀有番咁上下咯，更何況，你本來以為自己係胃痛之嘛，你都唔知係心臟病，所以我哋唔會做額外嘢，即係唔會通波仔救你。如果瑪麗醫院夠膽咁樣賤待財爺，功夫茶肯定，食衞局局長周一嶽十個人頭都唔夠落地！

咁就難怪馮先生質疑醫管局救人有雙重標準，佢話：「曾俊華就『黃金六小時』，我阿媽拎綜援，就六十日咩都做唔到！」

講開呢位馮先生，功夫茶有少少思疑佢嘅時辰八字同屯門醫院相沖相剋，點解咁講呢？因為佢一家人都畀屯門醫院玩到殘又玩到謝。馮先生尊翁，七月又係因為心臟病送去屯門醫院，結果，死咗。馮先生千金，九月確診豬流感，去屯門醫院急症室求診，醫院職員唔知係咪驚青得滯，竟然要求佢去停車場三十幾度高溫之下等候。馮先生太太，上月肚痛又係幫襯屯門醫院，院方求求其其未知乜嘢事就話要開刀做手術，好彩馮太痛痛下又唔覺得好痛，咁先至避過一劫咋。

馮先生一家人嘅可怕經歷係咪好悲哀呢？當然悲哀，不過都有一個正面訊息嘅，就係教訓小朋友：嗱，勤力讀書呀，發憤圖強呀，將來做一個達官貴人，以曾俊華為榜樣，咁你就點病點痛都有得醫，否則咯喎，貧病交迫冇人救！