棠哥話，當年佢向政府提咗多個中港合作嘅方案，大部分都被採納，例如二十四小時通關和拓大跨境範圍等。之後佢話鋒一轉，擰晒頭咁講：「最遺憾嘅係教育﹗」棠哥憶述當年去過出入境口岸親身視察，見盡「偉大父親」一早幫仔女孭書包湊返學嘅情景，搞到佢好感慨，於是拿拿臨同當時教統局常秘傾喺深圳設立港式學校為港人內地子女提供免費教育。

「呢個常秘依家做緊人大」

點知對方當時以一句「福利不可為」回絕棠哥，仲反問如果為港人內地子女提供免費教育，第時加拿大、澳洲嘅港人子女又話要免費教育點算？棠哥尋日講番件事仲好勞嘈，意有所指咁講：「呢個常秘依家做緊人大反而成日講點樣喺深圳起學校，教育下一代。」棠哥無講明昔日嘅常秘、今日嘅人大代表係邊位，不過大家估到喇。