特區政府揼咗二百一十六億元出嚟搞西九硬件，但轉過頭就大削「九大」藝團撥款。所以話呢個年頭，乜都係親力親為好啲，西九文化區諮詢會成員黃英琦（Ada）就坐言起行，搞咗個以「MaD（瘋狂）」為名嘅創意比賽，希望可以「Make a Difference（創不同）」。
Ada尋日向傳媒介紹佢籌備咗半年嘅「MaD」。活動重頭戲係明年一月廿二至廿四日，喺葵青劇院一連三日嘅講座兼工作坊兼劇場。參加者唔係報個名就得，需要寫篇文或者拍條片表達自己，參加完三日活動，更可以用一年時間落實自己嘅創意，贏取十萬元大獎。Ada話三日活動名額約八百個，每位六百元，有經濟困難可以申請豁免。
成個活動耗資成百萬元，雖然有商務及經濟發展局同馬會資助，但Ada落足心力，都係唔想香港只得工廠式啤出嚟嘅人才，所以呢個活動會持續每年搞，佢仲雄心萬丈，希望今次點火可以燒到去成個亞洲地區，大家可以睇下，明年一月，佢把火喺葵青劇院燒成點。