香港人鍾意睇波，為咗睇波，捱夜都制，但香港過幾年可能有機會舉行無家者世界盃，唔知大家又有無興趣。本身係青年事務委員會主席嘅和富社會企業會長李宗德（Joseph）尋日同傳媒透露，積極爭取一四年喺香港舉辦無家者世界盃，希望提升香港人對無家者嘅關注。
同時係和富大埔班主嘅Joseph話，雖然自己唔踢波，但好相信運動可以團結社區，所以由佢牽頭嘅和富社企由○五年開始資助香港社區組織協會，組織嘅香港無家者做足球隊參加無家者世界盃，等呢班無家者得到團隊嘅溫暖，同時幫佢哋融入社會。
不過要搞無家者世界盃，錢係最首要嘅問題。之前和富資助班無家者參加世界盃只要十多二十萬就可以搞掂。但如果香港要做主辦城市，計計埋埋估計要成千萬，如果搵唔到資助都幾頭痕。
另外就係政策問題，如果香港申辦成功，各國會有數以千計嘅無家者嚟香港，呢班參賽者通常係無業人士，Joseph擔心入境處會唔批佢哋入境。不過自從無家者世界盃被拍成電影之後，香港人對呢個運動嘅認識高咗好多，相信政府都唔會刻意留難嘅。