聽日煲呔曾會到立法會宣讀新一份施政報告，到時會唔會出現掟蕉、爆粗場面仲係未知數。不過尋日泛民主派開會後講明，如果施政報告唔啱佢哋心意，泛民就會有集體行動，不過係乜嘢行動就不得外洩，仲話劉慧卿落咗「柯打」，邊個爆料就要斬頭。咁講即係令煲呔曾有大把想像空間，都唔知應該着雨褸定係戴頭盔去立法會。
泛民主派尋日開飯盒會商討玩嘢大計，會後人人一致封口，唔肯講究竟預備咗咩招數，只係話如果施政報告真係無講政改的話，泛民就會有所行動，行動內容絕密。
不過我哋聽聞，泛民主派之所以懶神秘賣關子，暗啞底其實係佢哋仲未諗到絕世好橋，好似集體離場、舉紙牌呢啲了無新意嘅方法都有傾過，但係大家未有共識點搞，所以聽日朝早宣讀施政報告前，泛民主派要開多一次會仔細研究。真係唔知就畀佢嚇死，知道就笑死。
其實如果要達到哄動嘅效果都唔難，抄閱兵尾聲嘅橋段，放到成個議事堂圓拱形天花板都係氣球都好壯觀，或者參考《殘酷一叮》，聽到唔高興，就按動叮叮，請煲呔曾下台。