小霍尋日以東亞運籌委會主席身份出席隊際項目抽籤儀式，卓妮追問佢有冇份投票支持巴西，小霍面有難色唔肯吐「真相」，但講起各國元首拉票戰況就滔滔不絕。

李麗珊話兩個囡囡游泳天分極高，希望栽培佢哋成才。（嚴少阡攝）	西班牙國王卡洛斯（右）親自游說小霍投西班牙馬德里一票，仲同小霍影番張相留念添。 （相片由霍震霆提供）	國際奧委會終身榮譽主席薩馬蘭奇（左）拉住小霍（右）合照。

國王球王輪流拉票

小霍話，當佢喺北京出席建國六十周年慶典期間，突然收到美國一位高層政要致電游說，令佢十分驚訝，去到哥本哈根就更誇張，西班牙國王卡洛斯及國際奧委會終身榮譽主席薩馬蘭奇車輪轉上前拉票，叫佢投西班牙神聖一票，「萬世球王」比利亦走近搭實小霍膊頭打招呼，唔使問都知，梗係叫佢投巴西一票喇。正所謂盛情難卻，到底小霍將手中一票投畀邊個呢？睇怕只有佢最清楚。不過小霍對巴西申奧成功非常受落，擺出鬼馬表情，話要學定森巴舞湊熱鬧。

珊珊培養囡囡接班

巴西奧運令小霍期待，仲有五十幾日就揭幕嘅東亞運就令佢好緊張。小霍話，國際奧委會會長羅格及亞奧理事會會長艾哈邁德‧法赫德‧薩巴赫已應承來港出席東亞運開幕式喎。

尋日記者會上，同時委任五位傑出運動員擔任東亞運大使，包括風之后李麗珊、羽壇名將陳念慈等。身為兩女之母嘅珊珊決定唔參加東亞運，就連二○一二年倫敦奧運都放棄喎。犧牲咁大，皆因佢發覺兩個囡囡運動天分甚高，四歲大女已識得徒手潛水執貝殼，嚟緊又會參加泳會游泳賽，仲玩埋風帆，絕對係體壇明日之星；兩歲細女亦曉得游水，湊女咁有滿足感，難怪珊珊唔願再戰江湖囉。

卓妮