以今屆立法會為例，雖然有四名女新丁陳淑莊、李慧琼、葉劉淑儀、梁美芬，以及重返議會嘅何秀蘭加盟，但如果扣番選輸咗或者放棄連任嘅上一任女議員，女議員人數比上屆仲少咗一名，佔整體議員數目唔夠兩成，按照婦女團體嘅標準明顯唔合格。即將成立嘅甘乃威事件調查委員會，就將立法會男多女少嘅問題進一步凸顯。

立法會內務委員會早前通過由內會主席劉健儀，就民主黨議員甘乃威涉嫌性騷擾女助理事件提出彈劾動議，稍後會成立一個七人調查委員會跟進，嚟緊星期五會舉行首次籌備會議。根據有關嘅國際準則，涉及性騷擾嘅調查委員會應該由女性佔多數，即係最少要有四名女議員參與。表面上睇今屆有成十一名女議員，理應足夠有餘，但由於部分女將因為唔同嘅理由唔會參與調查，就令到問題變得複雜化。

需平衡性騷擾尺度觀點

例如甘威嘅黨友劉慧卿，就一早講明會避嫌唔參與調查。根據《議事規則》，提出彈劾動議嘅議員亦唔可以加入調查委員會，即係又少咗劉健儀一位女將。有議員又認為與甘威同屬港島區嘅議員，為免出現利益衝突亦應該主動避嫌，當堂又冇咗余若薇、陳淑莊、葉太同何秀蘭四個女人。最後剩番吳靄儀、梁劉柔芬、李鳳英、李慧琼同梁美芬五揀四，據聞部分人仲好唔想沾手今次事件，認真惡搞。

有議員亦指出，調查委員會一方面要以女性佔多數，但另一方面亦要有一定數目嘅男議員參與，以平衡兩性之間對性騷擾問題嘅尺度同觀點。根據呢個原則，曾經講過「十個女人十個係雞」嘅詹培忠、畀人到喺巴黎開房嘅李國寶、以及涉嫌越洋向青島美少女「孔雀開屏」嘅謝偉俊，都係調查委員會嘅不二之選。如果佢哋都認為甘威真係涉及性騷擾，其他人仲邊有資格質疑。