女高官行列中有幾位「書法派」，民政事務局常秘尤曾家麗師承著名書法家高雲州多年，堪稱高官學生中嘅「大師姐」，不過七十八歲嘅高老師去年中風後無再教學生，但尤太依然無偷懶繼續練字，佢話祝福高老師早日好番，重出江湖教佢喎。
尤太尋日朝早拉埋「好打得」嘅發展局局長林鄭月娥現身中環遮打道，為第四屆慈善競技賽「鼠戰中環」主禮。五百位穿着創意服飾嘅參賽者逼爆遮打道，有人化裝成小丑，亦有美女露出香肩扮性感鼠女，玩法咁出位，難怪兩位女高官要錫身，一於企埋一邊負責鳴槍起步算嘞。
尤太唔擅長玩競技遊戲，但寫書法就絕對到家，年前更拉埋運輸及房屋局局長鄭汝樺及商務及經濟發展局局長劉吳惠蘭一齊開書法展。講起高老師近年專心養病無再執教鞭，尤太都話好掛住老師。佢依家就跟隨書法研習會內另一位老師繼續練字。近日忙於籌備東亞運，尤太先至少咗時間寫字咋。