遠足籌款活動「樂施毅行者」每年都有大批運動健將參加，今屆就定咗喺下個月廿日開始舉行，連已經五十六歲嘅懲教署署長郭亮明都玩埋一份，自己組一隊，同其餘十六隊同事一齊參賽。早聞郭Sir平時喜歡邊巡視監獄邊聽下屬報告，唔知係咪因為咁，尋日佢同埋一班記者試行獅子山其中一段比賽路徑時，上山竟然好似行平地咁快，幾個年輕記者只能夠氣都喘埋望住其背影，期間有幾次更加連佢個影都望唔到，只能講一句甘拜下風。
郭Sir健步如飛唔在講，隨身攜帶嘅背包仲好似百寶袋咁，拎完一支支冰水出嚟，仲有一支支嘅運動飲料，源源不絕咁不斷請已經上氣唔接下氣嘅記者飲嘢。
講番「樂施毅行者」比賽，原來郭Sir早喺○一年仲係助理署長嗰陣，已經參加過一次，當時以卅個鐘完成賽事，雖然今次自言四個人加埋已經過咗二百歲，又因公事繁忙，依家同三個任職懲教署總主任嘅隊員都係練過兩次，但係都希望好過上次成績。郭Sir經過觀察後又話，訓練過幾次，暫時覺得企嶺下與飛鵝山一段最難行，已經同同事喺嗰度特登操吓，希望取得更好嘅成績。