殊不知消防處唔知頭唔知路，內部抽查救護召喚個案，鬼拍後尾枕踢爆非危急個案原來只佔一成左右，自打嘴巴，認真搞笑。

因乜事兩個數差咁遠？仲使講，分明就係港府弄虛作假篤數啦，更好笑嘅係，消防處處長盧振雄除咗滅火救人之外，原來都好識「死雞撐飯蓋」呢一招。佢話兩項數字唔可以直接比較，本港每年有六十萬宗召喚救護車個案，就算當中一成係非危急個案，即係有六萬多宗屬濫用個案。佢仲話濫用數字唔算少，叫市民如果小病就咪召喚救護車，以免浪費資源喎。

唔好玩啦，你估白車係名貴跑車，冇事都要坐一坐呀？貪大吉利是咩！其實除咗極少數刻意濫用服務嘅人之外，絕大多數市民都係因為情況危急至叫白車，作為相關部門嘅高官，唔好好解決資源不足問題，反而三句唔埋兩句就責怪市民濫用，有冇再冷血啲呀！

正所謂「如人飲水，冷暖自知」，小市民覺得身體有唔妥，又唔知病情會唔會突然惡化，喺咁嘅情況下call白車，根本係人之常情。再講，到底乜嘢叫病情輕，乜嘢叫病情重，唔好話醫學常識有限嘅小市民唔知啦，即使係專家，一時三刻都未必分得清喇。

以財政司司長曾俊華早前心臟病發為例，唔好以為好似睇戲咁，捂住心口突然撻低先至係心臟病喎，佢初時只不過以為係胃痛㗎咋，點知醫生仔細檢查之後，先至發現佢心臟三條主要血管塞晒，要立即做「通波仔」手術。

財爺總算福大命大，如果依家已經實施咗白車分級制，接電話嗰位一聽到話「胃痛」，諗都唔諗掟佢入非危急類別，咁就大件事喇。退一步講，如果換轉係小市民，究竟可唔可以行出醫院門口，都仲係未知數。

仲有呀，好多人覺得損手損腳冇乜大礙㗎，但有救護人員表示，曾經試過有傷者只不過整傷手指，竟然因為怕血，嚇到幾乎休克，所以就算係非危急個案，邊個敢擔保完全冇潛在風險吖？

既然當局咁鍾意玩數字遊戲，咁不妨以子之矛攻子之盾。消防處指一成召喚白車屬於非危急個案，咁即係表示另外嗰九成係危急個案啦，九成即係五十四萬宗，何止十萬火急，直頭係五十四萬火急，當局仲唔快快趣趣拆掂甩皮甩骨、烏龍百出嘅救護服務！