正生書院申請遷往梅窩嘅爭議啱啱曝光時，吸引咗大批政界人士群起關注抽水，但其後正生爆出帳目問題後，好多人又立即潛晒水閃開。不過曾經為咗正生學生喺電台首次公開流下男兒淚嘅前商務及經濟發展局局長馬時亨，就對佢哋不離不棄，尋日佢特別搵咗兩名正生學生做嘉賓，為佢主持嘅電台節目打頭炮，證明佢唔係為博出位爭曝光先關注正生。
肥亨升呢做教授後，尋日首次正式擔任電台節目主持，大部分時間都畀番啲被訪者發揮，自己只係偶爾插言問吓問題同做總結，唔知佢係咪特登低調啲，費事變咗「咪霸」。佢唯一提到自己嘅，就係原來佢細細個嗰陣就好識性，見到有長輩食鴉片煙，已經識得叫自己爸爸媽媽唔好掂。
肥亨聽完幾位年輕人、包括兩名正生學生講述佢哋吸毒同戒毒經歷後，慨嘆其實佢哋都係受害者，毒品問題嘅元兇第一個係毒販，其次就係學生嘅父母同學校，如果父母肯多啲關心子女，學校做好啲德育教育同支援，唔係淨係識得出咗事之後怪責學生，佢話香港就有希望成為無毒城市。