廣深港高鐵項目炸彈處處，有菜園村居民揚言不遷不拆，公共專業聯盟前排又拋出造價平啲、收地少啲嘅方案，相信運輸及房屋局局長鄭汝樺（Eva）都幾頭痕。尋日民主黨李永達嘅荃灣辦事處新居入伙，Eva親身捧場兼大派高帽，佢話自己大學畢業嗰陣，高達已經係區議員，而且係「勤力、盡責」嘅議員，Eva用形容詞毫不吝嗇外，仲陪高達切埋蛋糕先走。後來高達閒談間講起，原來Eva擔心民主黨會支持公共專業聯盟方案，希望該黨唔好太快下決定。
唔知係咪見Eva咁有誠意，高達隨即表白，話公共專業聯盟個方案可能低估咗造價，而且未必符合高鐵接駁市中心嘅概念，果然有來有往。
講番高達呢個位於荃灣嘅新竇，其實只係由原來嘅川龍街搬上去兆和街，面積三百幾呎要八千蚊租，比以前貴三千蚊，但人流好得多，高達話好彩佢個職員肯自願減薪，否則赤字非常嚴重。最搞笑嘅係辦事處隔籬係一間足浴店、即係腳底按摩，招牌喺正議員辦事處嘅招牌下面，驟眼睇以為高達嘅辦事處有足浴服務。高達話自己無幫襯過，據職員講應該係正經嘅，唔知高達第日行到攰攰哋，會唔會行過去隔籬幫襯呢？